ꤊꤢꤪꤘꤛꤢꤩꤖꤢꤨ ꤖꤢꤨꤏꤛꤢꤩ꤭ꤗꤟꤌꤣ, ꤙꤛꤢ꤭ꤒꤢ꤬ꤊꤟꤢꤧ꤬ꤖꤢꤨ ꤖꤢꤨꤋꤤ꤭ꤖꤢꤧ꤭ꤊꤛꤢꤩ꤬꤯
ꤋꤢ꤭ꤢꤨ꤬ꤘꤢꤨ꤬ꤖꤢꤨ ꤓꤢꤨ꤬ꤋꤢ꤭, ꤊꤟꤛꤢ꤭ꤙꤥ꤭ꤘꤢꤨ꤬ꤖꤢꤨ ꤜꤢ꤬ꤒꤛꤢ꤬꤯
ꤤꤝꤤ ꤥ꤬ꤒꤥ꤬ ꤓꤛꤢꤩ꤭ꤜꤟꤢꤨ ꤊꤟꤢꤩꤒꤟꤢꤦ꤭, ꤘꤢꤪ꤭ꤡꤟꤢꤧ ꤥ꤬ꤒꤥ꤬ ꤘꤢꤩꤪ꤭ꤏꤥ꤬ ꤜꤢ꤬ꤕꤚꤛꤣ꤯
ꤋꤝꤤ ꤥ꤬ꤚꤟꤥꤗꤢ꤬ ꤊꤟꤢꤩꤜꤟꤢꤨ, ꤡꤢꤪꤖꤛꤢ꤬ ꤥ꤬ꤘꤌꤣ꤭ꤗꤢ꤬ ꤊꤟꤢꤩꤕꤛꤢ, ꤙꤟꤌꤣꤗꤟꤌꤣ ꤥ꤬ꤢꤧꤗꤢ꤬ ꤥ꤬ꤠꤤ꤭꤯
ꤋꤢꤧꤓꤢꤨ꤬ꤘꤤꤗꤢ꤬ ꤢ꤬ꤜꤟꤢꤪ꤭ ꤕꤜꤟꤢꤧꤙꤢꤨ꤭, ꤟꤢꤩꤙꤢꤧ꤬ ꤕꤢ꤬ꤡꤟꤢꤧꤗꤢ꤬ ꤢ꤬ꤊꤛꤢ꤭ ꤍꤟꤥꤞꤢꤧ꤬꤯
ꤍꤟꤥꤞꤛꤢꤩ꤭ ꤔꤢ ꤗꤟꤌꤣꤕꤚꤟꤢꤧ, ꤗꤤ꤬ꤕꤟꤤ꤭ ꤔꤢ ꤒꤢ꤬ꤔꤢꤪ꤭꤯
ꤍꤟꤥꤓꤢꤨ꤬ꤞꤢꤧ ꤟꤛꤢ꤭ꤕꤟꤢꤩ ꤋꤝꤤ, ꤍꤟꤥꤋꤢꤋꤥ꤬ ꤟꤛꤢ꤭ꤕꤟꤢꤩ ꤊꤜꤛꤢꤩ꤭, ꤍꤟꤥ ꤓꤢꤨ꤬ꤞꤢꤧ ꤟꤛꤢ꤭ꤕꤟꤢꤩ ꤕꤚꤟꤢꤧ꤬ꤗꤢꤪ꤬꤯
ꤏꤛꤢꤩ꤭ꤖꤢꤨ ꤥ꤬ꤊꤚꤛꤢ ꤢ꤬ꤓꤝꤟꤥ꤭ ꤊꤜꤝꤤ꤭, ꤕꤚꤟꤢꤧ꤬ꤥ꤬ꤊꤚꤛꤢ ꤢ꤬ꤓꤝꤟꤥ꤭ ꤘꤢꤨ꤬꤯
ꤏꤛꤢꤩ꤭ꤗꤟꤤ꤬ ꤔꤟꤌꤣ꤭ꤕꤟꤢꤩ ꤘꤢꤪ꤭ꤊꤢꤨ꤭ꤒꤥ꤬, ꤕꤚꤟꤢꤧ꤬ꤗꤟꤤ꤬ ꤔꤟꤌꤣ꤭ꤕꤟꤢꤩ ꤘꤢꤪ꤭ꤡꤟꤢꤧꤒꤥ꤬꤯
ꤏꤛꤢꤩ꤭ꤖꤢꤨꤥ꤬ꤊꤚꤛꤢ ꤢ꤬ꤋꤥ꤭ ꤖꤟꤌꤣ꤭ꤜꤢꤨ꤭, ꤕꤚꤟꤢꤧ꤬ꤥ꤬ꤊꤚꤛꤢ ꤢ꤬ꤋꤥ꤭ ꤗꤟꤢꤩ꤬ꤐꤢꤪꤜꤢꤨ꤭꤯
ꤏꤢꤨ꤬ꤏꤢꤧ ꤔꤟꤢꤩꤜꤟꤥ꤬ ꤏꤥ꤭ꤚꤟꤛꤢ꤬ ꤟꤤ꤬ꤘꤢꤪ꤯
ꤏꤛꤢꤩ꤬ꤜꤟꤤ꤬ꤙꤢꤪ ꤙꤢꤪꤔꤟꤤꤓꤛꤢꤩ꤭, ꤜꤤ꤭ꤜꤢꤦꤐꤟꤌꤣ꤬ ꤏꤤ꤭ꤔꤟꤤꤗꤤ꤬꤯
ꤒꤢ꤬ꤚꤟꤢꤧ꤭ ꤢꤩ꤬ꤏꤢꤧ꤬ꤒꤥ꤬, ꤏꤢꤨ꤬ꤥ꤬ ꤒꤢ꤬ꤏꤛꤢ꤭ꤒꤥ꤬꤯
ꤒꤢ꤬ꤜꤟꤢꤧꤜꤢꤧ꤬ ꤡꤢꤪ꤬ꤔꤢꤘꤤ꤭, ꤏꤤ꤭ꤜꤢꤪ꤭ꤜꤢꤧ꤬ ꤕꤟꤢꤪ꤬ꤔꤢꤙꤟꤌꤣ꤯
ꤒꤢ꤬ꤔꤟꤢꤩ꤬ꤏꤢꤧ꤭ꤕꤜꤢ꤭, ꤒꤢ꤬ꤕꤟꤢꤦ꤭ꤏꤢꤧ꤭ꤑꤟꤢ꤯
ꤒꤢ꤬ꤜꤢꤧꤖꤥ꤭ ꤢ꤬ꤖꤥ꤭ꤡꤛꤣ꤭ꤊꤟꤛꤢ꤭, ꤗꤢꤪ꤬ꤗꤟꤌꤣꤒꤝꤟꤥ ꤢ꤬ꤟꤢꤪꤊꤢꤨ꤭ꤞꤢꤪ꤭, ꤘꤛꤢꤩ꤭ꤞꤢꤧ꤬ꤒꤝꤟꤥ ꤢ꤬ꤟꤢꤪꤊꤢꤨ꤭ꤋꤢꤧ꤬꤯
ꤒꤥ꤭ꤞꤢꤧꤕꤜꤢꤪ꤬ ꤋꤢ꤭ꤢꤨ꤬ꤞꤢꤧꤑꤢꤩ꤭, ꤙꤢꤧ꤬ꤞꤌꤣ꤬ꤓꤛꤢꤩ꤭ ꤗꤢꤧ꤬ꤞꤢꤧ꤬ꤞꤢꤧꤗꤛꤢ꤯
ꤓꤢꤩ ꤗꤟꤌꤣꤕꤚꤟꤢꤧꤒꤥ꤬, ꤋꤢꤧ ꤓꤢꤨ꤬ꤊꤢꤧ꤬ꤒꤥ꤬꤯
ꤓꤛꤢꤩ꤭ꤘꤢꤨ꤬ ꤔꤢ ꤞꤢꤪ꤬ꤞꤝꤤ, ꤋꤝꤤꤘꤢꤨ꤬ ꤔꤢ ꤕꤚꤟꤢꤧ꤬ꤜꤟꤢꤨ꤬꤯
ꤓꤢꤨ꤬ꤒꤢ꤬ꤊꤜꤢꤩ꤭ ꤐꤟꤌꤣ꤬ꤚꤛꤥ ꤔꤢ ꤜꤟꤛꤢ꤭, ꤕꤚꤟꤢꤧ꤬ꤜꤟꤢꤨ꤬ꤒꤢ꤬ꤊꤜꤢꤩ꤭ ꤡꤛꤣꤚꤛꤥ ꤔꤢ ꤊꤜꤛꤢ꤯
ꤓꤢꤨ꤬ꤞꤢꤧꤗꤢ꤬ ꤠꤤ꤭ꤊꤛꤢ꤭, ꤕꤢ꤬ꤡꤟꤛꤢꤩꤗꤢ꤬ ꤖꤛꤢꤩꤘꤝꤥ꤯
ꤓꤝꤤ꤬ꤥ꤬ꤚꤟꤥ ꤢ꤬ꤕꤟꤢꤩꤐꤟꤢꤪ꤭, ꤐꤟꤢꤪ꤭ꤥ꤬ꤚꤟꤥ ꤢ꤬ꤕꤟꤢꤩꤓꤝꤤ꤬꤯
ꤓꤛꤢ꤬ꤜꤢꤨꤟꤤ꤬ ꤢ꤬ꤒꤢ꤬ꤕꤟꤢ꤬ꤞꤢꤧꤕꤜꤢꤪ꤬, ꤔꤟꤌꤣ꤭ꤜꤢꤨꤘꤢꤪ꤭ ꤢ꤬ꤒꤢ꤬ꤊꤜꤢꤦ꤭ ꤞꤌꤣ꤬ꤓꤛꤢꤩ꤭꤯
ꤓꤢꤨ꤬ ꤜꤟꤛꤢ꤭ꤗꤟꤌꤣ ꤐꤟꤌꤣ꤬ ꤜꤟꤛꤢ꤭ꤖꤢꤧ꤭꤯
ꤓꤢꤨ꤬ꤥ꤬ꤚꤟꤥ ꤢ꤬ꤕꤝꤟꤤ꤬ ꤓꤛꤢ꤬ꤢꤧ꤭, ꤐꤟꤌꤣꤥ꤬ꤢꤧ ꤢ꤬ꤊꤢꤨ꤭ ꤒꤢ꤬ꤊꤜꤢꤦ꤯
ꤓꤝꤤ꤬ꤏꤢ꤭ꤕꤚꤟꤢꤧ ꤢꤩ꤬ꤟꤌꤣ꤬, ꤊꤢ꤬ꤛꤢ꤭ꤏꤢ꤭ꤕꤚꤟꤢꤧ ꤙꤢꤪ ꤘꤤ꤭ꤕꤟꤢꤪ꤬꤯
ꤓꤛꤢꤖꤢꤧ꤭ꤏꤤ꤭ꤘꤛꤢꤩ꤬ ꤢ꤬ꤜꤢꤩ꤭ꤘꤢꤪ꤭, ꤕꤟꤢꤨꤖꤢꤧ꤭ꤏꤤ꤭ꤘꤛꤢꤩ꤬ ꤢ꤬ꤜꤢꤩ꤭ꤊꤟꤢꤩ꤯
ꤓꤛꤢ꤬ꤢꤧꤏꤥ꤬ ꤋꤢ꤭ꤘꤟꤌꤣ꤬ ꤗꤟꤌꤣꤘꤢꤪ꤭, ꤜꤟꤛꤢ꤬ꤢꤧꤜꤟꤛꤢ꤭ ꤋꤢ꤬ꤔꤢꤪ꤭ ꤖꤢꤨꤥ꤬꤯
ꤓꤢꤨ꤬ꤚꤝꤤꤔꤢꤧꤥ꤬ ꤞꤎꤢꤪ꤬ꤖꤛꤢ꤭ꤒꤥ꤬, ꤐꤟꤢꤪ꤭ꤊꤟꤢꤦꤜꤟꤛꤢ꤬ꤊꤜꤟꤛꤢ꤬ ꤟꤢꤩ꤬ꤋꤢꤨ꤬ꤒꤥ꤬꤯
ꤓꤢꤨ꤬ꤕꤜꤢꤗꤢ꤬ ꤓꤢꤦꤞꤢꤨ꤭, ꤏꤛꤢ꤬ꤋꤢꤦꤗꤢ꤬ ꤊꤢ꤬ꤓꤢꤪ꤬꤯
ꤔꤢꤩꤥ꤬ ꤢ꤬ꤓꤝꤟꤥ꤭ꤘꤢꤪ꤭, ꤏꤛꤢꤩ꤭ꤓꤢꤪ꤭ꤥ꤬ ꤢ꤬ꤒꤝꤟꤥꤟꤤ꤬꤯
ꤔꤟꤢꤧ꤬ꤐꤟꤢꤪ ꤠꤢ꤭ ꤒꤣ꤬ꤘꤟꤌꤣ꤭ꤓꤝꤤ꤬ꤊꤚꤥ꤭, ꤔꤟꤢꤧ꤬ꤒꤢ꤬ꤋꤥ꤭ ꤠꤢ꤭ꤖꤢꤨ ꤏꤛꤢꤩ꤭ꤒꤢ꤬ꤓꤢ꤯
ꤔꤢꤧ ꤚꤢ꤭ꤔꤟꤤ ꤢ꤬ꤊꤜꤥ꤬, ꤟꤤꤘꤢꤦ꤬ ꤕꤟꤢ꤭ꤔꤟꤤ ꤢ꤬ꤒꤟꤢꤨ꤯
ꤔꤟꤢꤧ꤬ꤗꤛꤢꤓꤛꤢꤩ꤬ ꤙꤟꤌꤣꤜꤟꤌꤣꤘꤛꤢꤞꤢꤧ꤭ ꤔꤟꤢꤧ꤬ꤋꤢꤧꤊꤛꤢ꤭ ꤒꤢ꤬ꤏꤢꤨ꤭ꤘꤛꤢꤚꤟꤢꤩ꤯
ꤕꤟꤢ꤭ ꤞꤎꤢꤪ꤬ꤖꤢꤨꤗꤢ꤬ ꤐꤢꤪꤐꤝꤤ꤬, ꤟꤢꤩꤙꤢꤧ꤬ ꤕꤢ꤬ꤡꤟꤢꤧꤗꤢ꤬ ꤤ꤬ꤜꤢꤪ꤭꤯
ꤕꤚꤟꤢꤧ꤬ꤗꤢꤪ꤬ꤋꤢꤦ꤭ꤔꤢ ꤢ꤬ꤠꤟꤢꤧ꤬, ꤒꤢ꤬ꤙꤛꤢ꤭ꤓꤛꤢ꤭ꤔꤢ ꤢ꤬ꤒꤟꤢꤨ꤯
ꤕꤚꤟꤢꤧ꤬ꤗꤢꤪ꤬ꤒꤝꤟꤥ ꤔꤢ ꤋꤢꤨ꤬ꤜꤟꤌꤣ꤬, ꤏꤛꤢꤩ꤭ꤖꤢꤧ꤭ꤒꤝꤟꤥ ꤔꤢ ꤋꤢ꤭ꤗꤟꤤ꤯
ꤕꤚꤟꤢꤧ꤬ꤋꤢꤨ꤭ꤔꤢꤕꤟꤛꤢꤩ꤭, ꤕꤚꤟꤢꤧ꤬ꤗꤢꤪ꤬ꤔꤢꤊꤚꤟꤤ, ꤒꤢ꤬ꤗꤟꤛꤢꤩ꤬ꤔꤢꤊꤢꤪ꤭꤯
ꤕꤢ꤬ꤡꤟꤢꤧꤒꤢ꤬ꤜꤟꤛꤢꤩ꤭ ꤔꤢ ꤜꤢꤧ꤭, ꤗꤟꤌꤣꤕꤚꤟꤢꤧꤊꤢ꤬ꤜꤟꤛꤢ꤬ ꤔꤢ ꤔꤢ꤬꤯
ꤖꤢꤨ ꤒꤢ꤬ꤜꤝꤥ ꤗꤟꤌꤣꤖꤢꤧ꤭, ꤡꤟꤢꤦ꤬ ꤒꤢ꤬ꤜꤝꤥ ꤙꤛꤢ꤬ꤡꤢꤧ꤬꤯
ꤖꤢꤨꤡꤟꤛꤢ ꤤ꤬ꤞꤛꤥ ꤗꤟꤌꤣꤖꤢꤧ꤭, ꤡꤟꤢꤦ꤬ꤡꤟꤛꤢ ꤤ꤬ꤞꤛꤥ ꤙꤛꤢ꤬ꤡꤢꤧ꤬꤯
ꤖꤢꤨ ꤚꤛꤢꤗꤢ꤬ ꤗꤟꤌꤣꤖꤢꤧ꤭, ꤡꤟꤢꤦ꤬ ꤚꤛꤢꤗꤢ꤬ ꤙꤛꤢ꤬ꤡꤢꤧ꤬꤯
ꤖꤢꤨꤘꤢꤨ꤬ꤢꤩ꤬ꤘꤤ꤭, ꤓꤛꤢꤩ꤭ꤘꤢꤨ꤬ꤢꤩ꤬ꤒꤟꤢꤧ꤭꤯
ꤖꤢꤨꤋꤢꤨ꤭ꤚꤢꤧ꤬ ꤍꤟꤌꤣꤢꤩ꤬ꤚꤛꤢ꤬, ꤖꤢꤨꤗꤢꤪ꤬ꤗꤟꤌꤣ ꤍꤟꤌꤣꤘꤛꤢ ꤒꤢ꤬ꤏꤛꤢ꤭꤯
ꤗꤤ꤬ ꤒꤣ꤬ꤊꤟꤌꤣ ꤢ꤬ꤝꤥ꤭ꤘꤤ꤭ꤒꤥ꤬, ꤓꤢ꤬ꤒꤣ꤬ꤕꤜꤢꤪ꤬ ꤢ꤬ꤓꤝꤟꤥ꤭ ꤓꤢ꤬ꤓꤛꤢꤩ꤭ꤒꤥ꤬꤯
ꤗꤟꤥ꤬ꤘꤛꤢꤩꤋꤥ꤭ꤗꤢ꤬ ꤞꤛꤥꤥ꤬ꤘꤌꤣ꤭, ꤙꤢꤪꤡꤟꤛꤢꤍꤟꤥꤗꤢ꤬ ꤋꤥ꤭ꤥ꤬ꤚꤟꤥ꤯
ꤗꤟꤌꤣꤏꤥ꤭ꤚꤟꤛꤢ꤬ ꤘꤛꤢꤩ ꤙꤟꤌꤣꤖꤤ꤭, ꤖꤢꤧ꤭ꤏꤥ꤭ꤚꤟꤛꤢ꤬ ꤘꤛꤢꤩ ꤙꤟꤌꤣꤞꤢꤨ꤬꤯
ꤗꤢꤨ꤭ꤗꤟꤛꤢꤚꤢꤪ ꤘꤛꤢꤔꤢꤩ, ꤒꤢ꤬ꤊꤜꤢꤩ꤭ꤗꤢ꤬ ꤢꤨ꤭ꤐꤟꤢꤧ꤭ ꤢꤩ꤬ꤟꤌꤣ꤬꤯
ꤗꤟꤌꤣꤥ꤬ꤒꤥ꤬ ꤞꤢꤧꤢꤩ꤬ꤢ꤬ꤞꤢꤪ꤭, ꤖꤢꤧ꤭ꤥ꤬ꤒꤥ꤬ ꤞꤢꤧꤢꤩ꤬ꤤ꤬ꤋꤢꤧ꤬꤯
ꤗꤛꤢꤙꤢꤦ꤭ ꤓꤢꤨ꤬ꤊꤢꤧ꤬ꤖꤢꤧ꤭ꤜꤟꤤ꤬, ꤗꤛꤢꤙꤢꤦ꤭ ꤡꤢꤪꤊꤢ꤬ꤚꤢꤩ꤬ꤓꤛꤢꤩ꤭ꤙꤢꤨ꤭꤯
ꤕꤜꤢꤪꤜꤢꤨ꤭ꤖꤢꤨ ꤕꤜꤢꤦ꤭ꤘꤢꤨ꤬ꤙꤛꤢꤕꤜꤌꤣ꤬, ꤘꤝꤥ꤭ꤜꤢꤨ꤭ꤖꤢꤨ ꤕꤟꤢꤨꤝꤥ꤭ꤙꤛꤢꤕꤜꤢꤪ꤬꤯
ꤗꤟꤢꤪꤟꤢꤩꤏꤛꤢꤩ꤭ꤖꤢꤧ꤭, ꤗꤟꤢꤪꤜꤤ꤭ꤏꤛꤢꤩ꤭ꤗꤟꤌꤣ꤯
ꤘꤛꤢꤔꤢꤩꤐꤟꤥ꤬ ꤗꤟꤢꤪꤋꤤꤒꤥ꤬, ꤘꤛꤢꤋꤤ꤭ꤐꤟꤥ꤬ ꤗꤟꤢꤪꤏꤢꤧ꤭ꤒꤥ꤬꤯
ꤘꤢꤨ꤬ꤓꤛꤢ꤬ꤜꤢꤨ ꤞꤢꤧꤕꤜꤢꤪ꤬ꤒꤢ꤬ꤏꤢꤨ꤭, ꤘꤢꤨ꤬ꤓꤛꤢ꤬ꤞꤢꤧ꤭ ꤞꤢꤧꤕꤜꤢꤪ꤬ꤕꤟꤢꤪ꤬ꤕꤟꤢꤧ꤬꤯
ꤘꤢꤪ꤭ꤒꤣ꤬ꤘꤢꤪ꤭ ꤕꤟꤢꤩ ꤒꤣ꤬ꤊꤟꤢꤩꤒꤥ꤬, ꤒꤣ꤬ꤕꤚꤟꤢꤧ꤬ ꤕꤟꤢꤩ ꤒꤣ꤬ꤘꤢꤪ꤭ꤒꤥ꤬꤯
ꤙꤢꤪꤞꤛꤥꤗꤟꤌꤣꤕꤚꤟꤢꤧ ꤥ꤭ꤙꤢꤧ꤬ꤓꤛꤢꤩ꤭, ꤘꤥ꤬ꤞꤎꤢꤩꤪ꤬ꤊꤚꤢ꤭ ꤢꤩ꤬ꤔꤢꤪ ꤊꤟꤛꤢꤩ꤭꤯
ꤙꤢꤖꤢ ꤘꤢꤨ꤬ꤐꤟꤢꤒꤥ꤬, ꤢꤩ꤬ꤟꤌꤣ꤬ ꤊꤢꤪꤟꤢꤪꤒꤥ꤬꤯
ꤚꤟꤢꤨꤘꤢꤨ꤬ ꤥ꤬ꤞꤌꤣ꤭ꤊꤜꤤ꤭ꤒꤥ꤬, ꤕꤚꤟꤢꤧ꤬ꤘꤢꤨ꤬ ꤥ꤬ꤞꤌꤣ꤭ꤡꤟꤢꤨꤒꤥ꤬꤯
ꤜꤟꤢꤗꤢ꤬ ꤢ꤬ꤕꤣꤕꤚꤢꤧꤔꤢ ꤜꤟꤢꤪ, ꤏꤥ꤬ꤗꤢ꤬ ꤢ꤬ꤒꤝꤟꤥꤕꤚꤢꤧꤔꤢ ꤞꤎꤢꤪ꤬꤯
ꤞꤎꤢꤪ꤬ꤡꤢꤪꤗꤢ꤬ ꤊꤢ꤬ꤓꤢꤩꤪ꤬, ꤜꤟꤢꤪꤡꤢꤪꤗꤢ꤬ ꤥ꤬ꤔꤛꤢ꤭꤯
ꤞꤢꤧꤒꤢ꤬ꤏꤢꤨ꤭ ꤢ꤬ꤒꤟꤢ꤭ꤊꤛꤢ꤭, ꤕꤚꤛꤢ꤭ꤒꤢ꤬ꤜꤝꤥ ꤢ꤬ꤒꤟꤢ꤭ꤕꤜꤢꤧ꤯
ꤞꤢꤧꤐꤟꤢꤦꤙꤟꤌꤣꤚꤤ꤬ ꤓꤥ꤬ꤓꤌꤣ꤭ꤒꤥ꤬, ꤞꤢꤧꤒꤢ꤬ꤙꤛꤢ꤭ ꤢꤨ꤭ꤚꤟꤌꤣ꤬ ꤖꤢꤨꤒꤥ꤬꤯
ꤞꤢꤧꤐꤟꤢꤦꤔꤟꤤꤍꤟꤥ ꤥ꤬ꤔꤛꤢ꤭ ꤗꤟꤌꤣꤕꤚꤟꤢꤧꤋꤛꤢ꤬ꤘꤢ꤭, ꤞꤢꤧꤒꤟꤥ꤭ꤔꤟꤤꤍꤟꤥ ꤐꤢꤪꤐꤝꤤ꤬ ꤗꤟꤌꤣꤕꤚꤟꤢꤧ, ꤞꤢꤧꤜꤟꤢꤪ꤭ꤖꤛꤢꤩꤜꤟꤢ꤭ ꤊꤢ꤬ꤓꤢꤪ꤬ ꤗꤟꤌꤣꤕꤚꤟꤢꤧꤋꤛꤢ꤬ꤕꤜꤢꤧ꤬꤯
ꤠꤢꤧ꤬ꤜꤟꤢꤩ꤬ꤒꤣ꤬ꤊꤚꤟꤢꤪ꤬ ꤢ꤬ꤥ꤬ꤊꤛꤢ꤭ꤒꤣ꤬ꤙꤥ꤭, ꤠꤢꤧ꤬ꤒꤣ꤬ꤙꤥ꤭ ꤢ꤬ꤊꤢꤨ꤭ ꤢꤪꤒꤣ꤬ꤗꤟꤢ꤭꤯
ꤡꤟꤢꤨ꤭ꤗꤟꤌꤣꤍꤟꤥ ꤕꤤ꤬ꤕꤟꤌꤣꤢ꤬ꤖꤝꤟꤤ꤭, ꤖꤛꤢꤩꤖꤢꤧ꤭ꤜꤟꤢ꤭ ꤚꤟꤛꤢ꤬ꤒꤟꤢꤧ꤬ꤢ꤬ꤡꤟꤢꤧ꤯
ꤡꤟꤢꤨ꤭ꤗꤟꤌꤣꤍꤟꤥꤒꤥ꤬ ꤢ꤬ꤏꤢꤧ꤭, ꤖꤛꤢꤩꤖꤢꤧ꤭ꤜꤟꤢ꤭ꤒꤥ꤬ ꤢ꤬ꤕꤟꤛꤢ꤯
ꤡꤟꤢꤩ꤭ꤢꤧꤤ꤬ꤡꤛꤢ ꤏꤢꤧ꤭ꤕꤜꤢ꤭, ꤊꤜꤛꤢ꤬ꤢꤧꤊꤟꤢꤩ ꤏꤥ꤭ꤚꤟꤛꤢ꤬꤯
ꤗꤟꤌꤣꤕꤚꤟꤢꤧꤥ꤬ꤒꤥ꤬ ꤊꤟꤢꤩꤊꤛꤢ꤭, ꤒꤢ꤬ꤕꤜꤛꤢ꤬ꤥ꤬ꤒꤥ꤬ ꤓꤛꤢꤩ꤭ꤞꤤ꤯
ꤢ꤬ꤖꤢꤧꤕꤝꤟꤥ꤭ ꤊꤢ꤬ꤘꤝꤤ ꤕꤜꤢꤩ꤬ꤒꤥ꤬, ꤕꤢ꤬ꤡꤟꤛꤢꤨ ꤙꤛꤢꤩ꤬ ꤋꤥ꤭ꤒꤥ꤬꤯
ꤢꤩ꤬ꤔꤢꤪꤏꤢꤧ꤬ꤒꤥ꤬ ꤢꤨ꤭ꤘꤛꤢꤠꤤ꤬, ꤡꤛꤣꤔꤢꤪꤊꤜꤛꤢꤒꤥ꤬ ꤢꤨ꤭ꤘꤛꤢꤗꤟꤥ꤬꤯
ꤢꤩ꤬ꤏꤢꤧ꤬ ꤢ꤬ꤛꤝꤥ꤭ꤗꤢ꤬ ꤤ꤬ꤏꤛꤢ꤭, ꤢꤩ꤬ꤏꤢꤧ꤬ ꤢ꤬ꤊꤟꤢꤨꤗꤢ꤬ ꤔꤟꤤꤘꤢ꤭꤯
ꤢꤩ꤬ꤏꤢꤧ꤬ ꤘꤛꤢꤏꤢꤧ꤭ꤟꤢꤪꤒꤥ꤬, ꤔꤟꤤꤗꤢꤩ꤭ ꤘꤛꤢꤒꤢ꤬ꤙꤥ꤭ꤒꤥ꤬꤯
ꤢꤩ꤬ꤞꤢꤦꤏꤢꤧ꤬ ꤒꤤꤒꤢꤧꤗꤢ꤬ ꤞꤛꤢꤩ꤭, ꤙꤢꤧ꤬ꤞꤢꤦꤍꤟꤥ ꤒꤣ꤬ꤗꤢꤦ꤭ ꤏꤢꤨ꤬ꤥ꤬꤯
ꤢꤩ꤬ꤡꤟꤛꤢꤏꤢꤧ꤬ꤒꤥ꤬ ꤗꤛꤢꤙꤢꤦ꤭ꤋꤥ꤭, ꤚꤟꤛꤢ꤬ꤡꤟꤛꤢꤒꤟꤢꤧ꤬ꤒꤥ꤬ ꤗꤛꤢꤒꤟꤢꤨꤞꤛꤥ꤯
ꤢꤩ꤬ꤘꤢꤦ꤬ꤘꤤ꤭ ꤢ꤬ꤠꤤ꤬ꤒꤥ꤬, ꤡꤛꤣꤘꤢꤦ꤬ꤊꤜꤛꤢ ꤢ꤬ꤗꤟꤥ꤬ꤒꤥ꤬꤯
ꤥꤢꤨ꤭ꤓꤝꤤ꤬ ꤢ꤬ꤊꤜꤛꤢ꤬ꤒꤢ꤬ꤖꤢ꤭, ꤙꤢꤧ꤬ꤢꤨ꤭ꤖꤢꤨ ꤢ꤬ꤗꤛꤢꤗꤢꤧ꤬ꤞꤢꤧ꤬꤯
ꤥ꤬ꤖꤢꤦ꤬ꤗꤤ꤬ ꤢ꤬ꤜꤟꤢꤧ꤬, ꤥ꤬ꤖꤢꤦ꤬ꤓꤛꤢꤩ꤭ ꤢ꤬ꤊꤢ꤬ꤡꤟꤢꤨ꤯
ꤕꤟꤢꤨꤒꤟꤢ꤭ꤔꤥ꤬ ꤙꤢꤧ꤬ꤤ꤬ꤕꤜꤤ, ꤕꤚꤟꤢꤧ꤬ꤜꤟꤢꤨ꤬ꤒꤟꤢ꤭ꤔꤥ꤬ ꤙꤢꤧ꤬ꤢꤨ꤭ꤋꤢꤨ꤬꤯
ꤙꤢꤪꤞꤛꤥꤗꤟꤌꤣꤕꤚꤟꤢꤧ ꤚꤢꤪ ꤔꤟꤤꤙꤢꤧ꤬ꤍꤟꤥ꤫, ꤘꤢꤪ꤬ꤞꤎꤢꤪ꤬ꤊꤚꤟꤢ꤭ ꤚꤢꤪ ꤢꤩ꤬ꤙꤢꤧ꤬ꤓꤢꤨ꤬꤯